English
ក្រសួងអប់រំ យុវជន និងកីឡា ឆ្លៀតក្នុងពិធីអបអរទិវាគ្រូបង្រៀន ក្រោមប្រធានបទ «គុណភាពគ្រូ ជាគុណភាពមូលធនមនុស្ស សម្រាប់ការអភិវឌ្ឍប្រកបដោយចីរភាព» នៅថ្ងៃទី៥ ខែតុលា ឆ្នាំ២០១៨ នេះ បានផ្ដល់បណ្ណសរសើរ ដល់សាលារៀន អន្តរទ្វីប អាមេរិកាំង ចំនួន៣សាខា ដោយឯកឧត្តម រដ្ឋមន្ត្រី លោក ហង់ ជួនណារ៉ុន។
ផ្ដល់បណ្ណសរសើរ ដល់សាលារៀន អន្តរទ្វីប អាមេរិកាំង (AIS) ចំនួន៣បណ្ណនេះ គឺផ្ដោតទៅលើ ការងារដឹកនាំ គ្រប់គ្រងអង្គភាព បង្ហាត់បង្រៀនសិស្សានុសិស្ស ប្រកបដោយការទទួលខុសត្រូវ មនសិការវិជ្ជាជីវ:ខ្ពស់ និងទទួលបានសិស្សនិទេ្ទស A ក្នុងសម័យប្រឡងសញ្ញាបត្រមធ្យមសិក្សាទុតិយភូមិ ២០សីហា ២០១៨ កន្លងទៅថ្មីៗនេះ។ នេះបើតាមលោក ជាង ប៊ុនលី នាយកចាងហ្វាងមធ្យមសិក្សាទុតិភូមិ សាខាម៉ៅសេទុង។
៣សាខា ដែលទទួលបានបណ្ណសរសើរពី ក្រសួងអប់រំ យុវជន និងកីឡា នេះរួមមានទី១ សាលារៀន អន្តរទ្វីប អាមេរិកាំង សាខាម៉ៅសេទុង ទី២សាខាទួលគោក និងទី៣ សាខាចាក់អង្រែ។ សាខាទាំង៣នេះ ទទួលបានសិស្សនិទ្ទេស A ចំនួនសរុប២៣នាក់។
បើតាមនាយកចាងហ្វាង លោក ជាង ប៊ុនលី បានឱ្យដឹងថា សាលារៀន អន្តរទ្វីប អាមេរិកាំង ការផ្ដល់បណ្ណសរសើរនេះ គឺពិតជាល្អខ្លាំងណាស់សម្រាប់គ្រឹះស្ថានអប់រំទាំងឯកជន និងគ្រឹះស្ថានអប់រំរដ្ឋ ដែលបានលើកទឹកចិត្ត និងយកចិត្តទុកដាក់ ដល់គ្រឹះស្ថានអប់រំ ក៏ដូចសាលា ដែលសិស្សជាប់និទ្ទេស A។
លោកបញ្ជាក់បន្តថា ការផ្ដល់បណ្ណនេះ ក៏ជាការលើកទឹកចិត្តដ៏ល្អមួយ ដើម្បីឱ្យថ្នាក់ដឹកនាំ លោកគ្រូ អ្នកគ្រូទាំងអស់ បន្តប្រឹងប្រែងបន្ថែមទៀត ដើម្បីផលិតធនធានមនុស្សប្រកដដោយគុណភាព និងប្រសិទ្ធភាព នាពេលបច្ចុប្បន្ន និងអនាគត។
ជាចុងក្រោយ នាយកចាងហ្វាងរូបនេះ បានថ្លែងអំណរគុណ ដល់ក្រសួងអប់រំ យុវជន និងកីឡា ដែលបានផ្ដល់បណ្ណសរសើរ ដល់សាលារៀន ដែលមានសិស្សជាប់និទ្ទេស A ។ លោកក៏មិនភ្លេចអស់គុណ ដល់លោកគ្រូ អ្នកគ្រូ និងបុគ្គលិកគ្រប់ផ្នែកទាំងអស់ ដែលបានប្រឹងប្រែងយ៉ាងសស្រាក់សស្រាំបំផុត ដែលធ្វើឱ្យសាលារៀន អន្តរទ្វីប អាមេរិកាំង រីកចម្រើន និងមានកេរ្តិ៍ឈ្មោះល្បីល្បាញ រហូតមកដល់បច្ចុប្បន្ននេះ។
សូមជម្រាបថា «ទិវាគ្រូបង្រៀន ៥ តុលា» ឆ្នាំនេះ ត្រូវបានប្រារព្ធធ្វើឡើង នៅវិទ្យាស្ថានជាតិអប់រំ រាជធានីភ្នំពេញ ក្រោមវត្តមាននាយករដ្ឋមន្ត្រី រដ្ឋមន្រ្តីក្រសួងអប់រំ លោកគ្រូ អ្នកគ្រូ មកពីបណ្តាខេត្តរាជធានី និងអង្គការដៃគូអភិវឌ្ឍន៍ ព្រមទាំងសិស្សានុសិស្សជាច្រើនរូប៕អត្ថបទ និងរូបភាពដកស្រង់ពីអ៊ីនធ័រខន រ៉ូស្ទ័រ
