សិស្ស​ថ្នាក់​ទី៧​ ធ្វើ​ពិសោធ​អំពី​អត្តសញ្ញាណ​អុក​ស៊ី​សែន​

កាលពីថ្ងៃទី០៣ ខែកក្កដា ឆ្នាំ២០១៩ កន្លងទៅនេះ លោកគ្រូ នូ ស្រីស្រស់ គ្រូបង្រៀនមុខវិជ្ជាគីមីវិទ្យា បានបង្រៀនមុខវិជ្ជាគីមីវិទ្យាលើមេរៀន “អត្តសញ្ញាណអុកស៊ីសែន” ជូនដល់សិស្សថ្នាក់ទី៧ នៃសាលារៀន អន្តរទ្វីប អាមេរិកាំង សាខាម៉ៅសេទុង ។       នៅក្នុងសកម្មភាពបង្រៀននោះ លោកគ្រូ នូ ស្រីស្រស់ បានលើកយកចំណុចសំខាន់ៗនៃ ខ្លឹមសារមេរៀនមកបង្ហាញជូនដល់សិស្សានុសិស្សឱ្យបានយល់ដឹងពីគោលបំណងនៃមេរៀន ដំណើរការនានានៃការពិសោធ ការប្រើប្រាស់ឧបករណ៍ និងសម្ភារពិសោធសម្រាប់ពិសោធទៅលើអត្តសញ្ញាណអុកស៊ីសែន។ លើសពីនេះ លោកគ្រូ នូ ស្រីស្រស់ បានបង្ហាញពី សម្ភារពិសោធនានាដូចជា ទឹកអុកស៊ីសែន ម៉ងកាណែសឌីអុកស៊ីត កែវបាឡង ឬដប ធូប ដេកកេស ទឹកកំបោរថ្លា និងទុយោ។ ការលើកបង្ហាញបែបនេះ គឺលោកគ្រូចង់បង្ហាញពីរបៀបពិសោធ ដំណើរការនៃការពិសោធ និងបានបង្ហាញឱ្យសិស្សស្គាល់ពីសម្ភារនានាសម្រាប់យកទៅពិសោធបានកាន់តែច្បាស់ ហើយក៏ដើម្បីឱ្យសិស្សបានសិក្សាស្វែងយល់អំពីរបៀបពិសោធទៅលើអត្តសញ្ញាណអុកស៊ីសែន។ លោកគ្រូបានបន្ត​ថា មុខ​វិជ្ជា​វិទ្យាសាស្រ្ត​មិន​ត្រឹម​តែ​មាន​ខ្លឹម​សារ​ផ្សា​ភ្ជាប់​នឹង​ការ​   អនុវត្ត​ទៅ​តាម​ទ្រឹស្ដី​មេរៀន​ប៉ុណ្ណោះ​ទេ​ តែ​ក៏​ជា​តម្រូវការ​នៃ​ចំណេះ​ដឹង​ ដែល​សិស្សានុសិស្ស​កំពុង​ទាមទារ​ក្នុង​ការ​រៀន​សូត្រ​​ផង​ដែរ ហើយ​អ្វី​រឹតតែ​ពិសេស​ជាង​នេះ​ទៅ​ទៀត​នោះ ​ពិសោធន៍​អាចជា​ផ្នែក​​ដ៏​សំខាន់​​មួយ​​ទាក់​ទាញ​ចំណាប់​អារម្មណ៍​សិស្សានុសិស្ស​​ឱ្យ​ចូល​ចិត្តរៀនសូត្រ។ក្រោយពីបានពិសោធរួចរាល់ សិស្សានុសិស្ស បានលើកឡើងជាសំណួរសួរទៅកាន់លោកគ្រូ ហើយលោកគ្រូក៏បានពន្យល់បន្ថែមទៀតដល់សិស្សានុសិស្សអំពីទ្រឹស្តីល្អៗ ព្រមទាំងវិធីសាស្រ្តពិសោធផងដែរ។ ជាចុងក្រោយ លោកគ្រូ បានពន្យល់សិស្សានុសិស្សអំពីរបៀបពិសោធ ដំណើរការនៃការពិសោធ និងបង្ហាញអំពីលទ្ធផលនៃការពិសោធជូនដល់សិស្សានុសិស្សយ៉ាងក្បោះក្បាយ និងស៊ីជម្រៅបំផុត ហើយសិស្សានុសិស្សបានចូលរួមសហការគ្នាពិសោធជាលក្ខណៈក្រុមបានយ៉ាងល្អប្រសើរទៅលើប្រធានបទ “អត្តសញ្ញាណអុកស៊ីសែន ។ សមាជិកនីមួយៗនៃក្រុមពិសោធមានស្មារតីសហការ និងជួយពន្យល់ណែនាំគ្នាទៅវិញទៅមកដើម្បីឱ្យបានស្វែងយល់ និងចេះពីរបៀបពិសោធឱ្យបានគ្រប់គ្នា។ ក្រោយពេលពិសោធចប់សព្វគ្រប់ សិស្សានុសិស្សមានភាពសប្បាយរីករាយ ដោយបានស្វែងយល់ពីទ្រឹស្តីមេរៀន ព្រមទាំងអនុវត្តពិសោធបានយ៉ាងល្អ ហើយក៏បានថតរូបអនុស្សាវរីយ៍ជាមួយគ្នាក្នុងបរិយាកាសរីករាយ។