March 16th, 2019 by Veasna Kheang
កាលពីថ្ងៃទី១៤ ខែមីនា ឆ្នាំ២០១៩ កន្លងទៅនេះ សាលារៀន អន្តរទ្វីប អាមេរិកាំង បាន សហការជាមួយមន្ទីរព្យាបាលធ្មេញបស្ចិម បានរៀបចំសិក្ខាសាលាស្តីអំពី “សុខភាពមាត់ធ្មេញ និងការថែទាំ” ជូនដល់ប្អូនៗមត្តេយសិក្សារហូតដល់សិស្សានុសិស្សថ្នាក់ទី៦ នៃសាលារៀន អន្តរទ្វីប អាមេរិកាំង សាខាម៉ៅសេទុង។ លោក ជាង ម៉េងជូ ទន្តបណ្ឌិតនៃមន្ទីរព្យាបាលធ្មេញបស្ចិមបានមានប្រសាសន៍ លើកឡើងថាសុខភាពមាត់ធ្មេញជារឿងសំខាន់ណាស់សម្រាប់មនុស្សគ្រប់ៗគ្នា។ ដូចនេះប្អូនៗសិស្សានុ- សិស្សទាំងអស់ត្រូវដុសសម្អាតធ្មេញឱ្យបានញឹកញាប់ ដោយត្រូវដុសធ្មេញ២ ទៅ៣ដងក្នុង១ថ្ងៃ ដើម្បីសម្អាតកាកសំណល់ដែលនៅសល់កកតាមជើងធ្មេញ ក្រោយពេលបរិភោគចំណីអាហាររួចរាល់។ លើសពីនេះ យើងត្រូវទៅជួបគ្រូពេទ្យធ្មេញ២ ទៅ៣ដងក្នុង១ឆ្នាំ ដើម្បីឱ្យគ្រូពេទ្យលាងសម្អាតធ្មេញរបស់យើង និងធ្វើការត្រួតពិនិត្យក្រែងមានបញ្ហាផ្សេងៗ ការធ្វើបែបនេះ គឺដើម្បីកុំឱ្យធ្មេញរបស់យើងមានបញ្ហាធ្ងន់ធ្ងរ ហើយត្រូវចំណាយប្រាក់ច្រើន ដែលនាំឱ្យខាតបង់សេដ្ឋកិច្ចគ្រួសារ និងខាតបង់ពេលវេលារៀនសូត្រជាដើម។ បន្ថែមពីនេះ លោកទន្តបណ្ឌិត ជាង ម៉េងជូ-font-weight:bold”> បានលើកឡើងបន្តទៀតថា មាត់ធ្មេញគឺសំខាន់ណាស់សម្រាប់មនុស្សគ្រប់រូប តែបើមានជំងឺឈឺធ្មេញរ៉ាំរ៉ៃ បុគ្គលនោះពុំអាចមានសុភមង្គលក្នុងជីវ ភាពរស់នៅ ក្នុងការងាររកស៊ី ឬនៅក្នុងការសិក្សាក៏មិនអាចទទួលបានជោគជ័យនោះដែរ។ លោកវេជ្ជបណ្ឌិតបានបង្ហាញទៀតថាធ្មេញមានមុខងារសំខាន់ៗខ្លាំងណាស់សម្រាប់ការរស់នៅប្រចាំថ្ងៃ តែបើយើងមិនបានថែរក្សាឱ្យបានល្អទេ នោះធ្មេញនឹងក្លាយជាពុកផុយ ឬខូចជាមិនខាន។ ដូច្នេះ ត្រូវជ្រើសរើសរបបអាហារញ៉ាំឱ្យបានត្រឹមត្រូវ និងពិនិត្យធ្មេញឱ្យបានទៀងទាត់លើសពីនេះ វាគ្មិនក៏បានណែនាំពីរបៀបដុសសម្អាតធ្មេញ៦យ៉ាងដ៏មានប្រសិទ្ធភាព ដោយបានបង្ហាញពីជំហាននីមួយៗដូចតទៅ ជំហានទី១ មនុស្សគ្រប់រូបគួរតែដុសសម្អាតផ្ទៃខាងក្រៅនៃធ្មេញលើ។ ជំហានទី២ ត្រូវដុសសម្អាតផ្ទៃខាងក្រៅនៃធ្មេញក្រោម។ ជំហានទី៣ គឺជាដំណាក់កាលដុសសម្អាតផ្ទៃខាងក្នុងនៃធ្មេញលើ។ រីឯជំហានទី៤ ត្រូវដុសសម្អាតផ្ទៃខាងក្នុងនៃធ្មេញក្រោម ហើយជំហានទី៥ គឺដុសសម្អាតផ្ទៃទំពារនៃធ្មេញលើ និងជំហានទី៦ សម្អាតផ្ទៃទំពានៃធ្មេញក្រោម។ ជាចុងក្រោយ វាគ្មិនក៏បានបង្ហាញពីវិធីសាស្រ្តដើម្បីលើកកម្ពស់ការយល់ដឹងស្ដីពីសុខភាពមាត់ធ្មេញ និងការថែទាំធ្មេញឱ្យមានសុខភាពល្អជូនដល់សិស្សានុសិស្ស និងបង្ហាញពីវិធីសាស្រ្តងាយៗក្នុងការថែរក្សាអនាម័យសុខភាពមាត់ធ្មេញ និងការដុសសម្អាតធ្មេញ។
February 28th, 2019 by Veasna Kheang
កាលពីថ្ងៃទី២៦ ខែកុម្ភៈ ឆ្នាំ២០១៩ នេះ គណៈគ្រប់គ្រង នៃសាលារៀន អន្តរទ្វីប អាមេរិកាំង សហការជាមួយសមាគមភាពយន្តកម្ពុជា និងផលិតកម្មមាតុចក្រ ហ្វីលម៍ បានរៀបចំសិក្ខាសាលាស្ដីអំពីវិស័យភាពយន្តខ្មែរនៅកម្ពុជា ដល់សិស្សានុសិស្សថ្នាក់ទី១១ នៅសាលារៀន អន្តរទ្វីប អាមេរិកាំង សាខាម៉ៅសេទុង។ នៅក្នុងសិក្ខាសាលានេះ ប្រធានសមាគមភាគយន្តកម្ពុជា លោក ព្រំ សិលា បានលើកឡើងពីប្រវត្តិនៃការកកើតឡើងនៃវិស័យភាពយន្តខ្មែរ ព្រមទាំងការរីកចម្រើន និងការធ្លាក់ចុះនៃភាពយន្តខ្មែរ តាំងពីអតីតកាល រហូតដល់បច្ចុប្បន្ននេះ។
February 25th, 2019 by Veasna Kheang
កាលពីថ្ងៃទី២១ ខែកុម្ភៈ ឆ្នាំ២០១៩ កន្លងទៅនេះ សាលារៀន អន្តរទ្វីប អាមេរិកាំង នៅថ្នាក់ក្រោមមត្តេយ្យ មត្តេយ្យ និងបឋមសិក្សា នៅអគារ ងិន ហួយ បានរៀបចំសិក្ខាសាលាស្តីពី “សុវត្ថិភាពចំណីអាហារ” ដើម្បីឱ្យកុមារយល់ដឹងអំពីចំណីអាហារណាដែលប៉ះពាល់ដល់សុខភាព ហើយអាហារប្រភេទណាដែលមិនប៉ះពាល់សុខភាព។ ទាក់ទងនឹងសុវភាពចំណីអាហារនេះ លោកវេជ្ជបណ្ឌិត ងិន សុខរង្សី មកពីមជ្ឈមណ្ឌលសុខភាពសិស្ស ម៉េងលី ជេ. គួច មានប្រសាសន៍ថា ការទទួលទានបន្លែផ្លែឈើ ទោះបីថាវាជាជម្រើសល្អសម្រាប់សុខភាព ប៉ុន្តែបន្លែផ្លែឈើខ្លះក៏មិនល្អដែរ ព្រោះបន្លែផ្លែឈើមានផ្ទុកសារធាតុគីមីដែលឱ្យប៉ះពាល់ដល់សុខភាពទៅវិញទេ។
November 20th, 2018 by Veasna Kheang
កាលពីថ្ងៃ១៩ ខែវិច្ឆិកា ឆ្នាំ២០១៨ កន្លងទៅនេះ គណៈគ្រប់គ្រងនៃសាលារៀន អន្តរទ្វីប អាមេរិកាំង សហការជាមួយនឹងគម្រោងភ្នំពេញស្អាត បានបើកអង្គសិក្ខាសាលាមួយស្ដីពី យុទ្ធនាការភ្នំពេញស្អាត ដល់សិស្សានុសិស្ស។ នៅក្នុងសិក្ខាសាលានេះ អ្នកស្រី រស់ យ៉ាណា ប្រធានសាលារៀន អន្តរទ្វីប អាមេរិកាំង បានកោតសរសើរ ដល់ក្រុមយុវជន ស្ម័គ្រចិត្តក្នុងគម្រោងភ្នំពេញស្អាត ដែលមានសកម្មភាពយ៉ាងសកម្ម ក្នុងការរួមចំណែកកាត់បន្ថយ និងឈានទៅលុបបំបាត់សំរាម នៅក្នុងរាជធានី។ ទន្ទឹមនឹងនេះ អ្នកស្រី ក៏បានកោតសរសើរ ដល់អតីតសិស្សសាលារៀន AIS ដែលក្លាហាន មានទឹកចិត្ត និងមានសមត្ថភាពធ្វើកិច្ចការនៅក្នុងគម្រោងភ្នំពេញស្អាតនេះផងដែរ។ អ្នកស្រី រំពឹងថា សិក្ខាសាលានេះ នឹងជាប្រយោជន៍ ដល់សិស្សានុសិស្ស និងបន្តផ្សព្វផ្សាយ ដល់បងប្អូន មិត្តភក្ដិ និងមនុស្សនៅជុំវិញឱ្យបានផុសផុល ដើម្បីក្រុងភ្នំពេញ និងកម្ពុជាទាំងមូល មានសម្រស់កាន់តែប្រពៃ។
លោក ផល ពិសាល នាយកគ្រប់គ្រង និងជាប្រធានគម្រោងអនុវត្តស្អាត បានលើកឡើងថា នេះជាលើកទី២ ហើយ ដែលគម្រោងភ្នំពេញស្អាត សហការជាមួយសាលារៀន អន្តរទ្វីប អាមេរិកាំង បើកជាសិក្ខាសាលា ដល់សិស្សានុសិស្ស ដើម្បីជាប្រយោជន៍ ដល់សង្គមរួម។ លោកបន្តថា កម្មវិធីនេះ បើគ្មានការគាំទ្រ និងចូលរួមពីសាលារៀន AIS ទេ ក៏កម្មវិធីនេះ មិនអាចប្រព្រឹត្តិទៅបានដែរ។ ការបង្កើតឱ្យមាន យុទ្ធនាការភ្នំពេញស្អាតនេះ ព្រោះសំរាមមិនមែនជារបស់នរណាម្នាក់ទេ។ ពោលគឺកើតចេញពីយើងទាំងអស់គ្នា ដែលទាមទារឱ្យមានការចូលរួមចំណែក និងទទួលខុសត្រូវរួមគ្នាក្នុងទិសដៅមួយគឺ ស្អាត។ លោកបន្តថា យុទ្ធនាការភ្នំពេញស្អាតនេះ ក៏ផ្ដោតជាចម្បងទៅលើការផ្លាស់ប្ដូរឥរិយាបទ តាមរយៈការអប់រំ និងផ្សព្វផ្សាយក្នុងការគ្រប់គ្រងកាកសំណល់ក្នុងប្រទេសកម្ពុជា។ ជាពិសេសនៅរាជធានីភំ្នពេញ ក្រោមពាក្យស្លោក “សំរាមមិនធ្លាក់ដល់ដី ភ្នំពេញកាន់តែប្រពៃ»។ អត្ថបទ ដកស្រង់សារព័ត៌មាន ឌិ អ៊ីនធ័រខន រ៉ូស្ទ័រ
September 27th, 2018 by Veasna Kheang
កាលពីថ្ងៃទី២៥ ខែកញ្ញា ឆ្នាំ២០១៨ កន្លងទៅនេះ គណៈកម្មការនៃសាលារៀន អន្តរទ្វីប អាមេរិកំាង បានសហការជាមួយកាកបាទក្រហមកម្ពុជាដើម្បីបើកសិក្ខាសាលាស្តីពីការសង្រ្គោះបឋមសម្រាប់លោកគ្រូ អ្នកគ្រូ នៅសាលប្រជុំ សូវ ហុងគុយ
អគារ លីម គីមណយ សាលារៀន អន្តរទ្វីប អាមេរិកាំង សាខាម៉ៅសេទុង។ សិក្ខាសាលានេះដើម្បីឱ្យលោកគ្រូ អ្នកគ្រូទទួលបាននូវចំណេះដឹង និងបច្ចេកទេសថ្មីៗបន្ថែមទៀតក្នុងការសង្គ្រោះបឋម ដោយមានការបង្ហាញពីអ្នកជំនាញមកពីកាកបាទក្រហមកម្ពុជា។ ពីព្រោះសង្គ្រោះបឋម អាចជួយសង្គោះជីវិតមនុស្សបានសម្រាប់លោកគ្រូ អ្នកគ្រូដែលជាអាណាព្យាបាលទី២ របស់សិស្ស ដើម្បីទុកជាមូលដ្ឋានគ្រឹះសម្រាប់ជួយសង្គ្រោះមនុស្សរងគ្រោះពីហេតុការណ៍ផ្សេងៗទាំងនៅសាលា និងនៅផ្ទះជាដើម។
September 25th, 2018 by Veasna Kheang
កាលពីថ្ងៃ១៩ ខែកញ្ញា ឆ្នាំ២០១៨ កន្លងទៅនេះ គណៈកម្មការនៃសាលារៀន អន្តរទ្វីប អាមេរិកាំង បានរៀបចំសិក្ខាសាលាស្តីអំពី ការប្រឹក្សាសិស្សឱ្យកាន់តែទទួលបាននូវប្រសិទ្ទភាពខ្ពស់ជូនដល់លោកគ្រូ អ្នកគ្រូឱ្យទទួលបានចំណេះដឹងបន្ថែមទៀតសម្រាប់ជួយដល់កូនសិស្សឱ្យកាន់តែមានប្រសិទ្ធភាពខ្ពស់ក្នុងការប្រឹក្សាសិស្សានុសិស្ស ហើយវាលគ្មិនគឺលោកគ្រូ ស្រ៊ុន ហ៊ួរ សាស្រ្តាចារ្យចិត្រសាស្ត្រ នៃសាកលវិទ្យាល័យភូមិន្ទភ្នំពេញ។
September 5th, 2018 by Veasna Kheang
ចាប់ពីថ្ងៃទី៤ រហូតដល់ថ្ងៃទី៦ ខែកញ្ញា ឆ្នាំ២០១៨ គណៈកម្មការនៃសាលារៀន អន្តរទ្វីប អាមេរិកាំង បានរៀនចំសិក្ខាសាលាស្តីពីវិធីសាស្រ្តក្នុងការប្រឹក្សា និងដោះស្រាយបញ្ហារបស់សិស្សតាមបែបចិត្តសាស្រ្តជូនដល់លោកគ្រូ អ្នកគ្រូ និងបុគ្គលិក នៃសាលារៀន អន្តរទ្វីប អាមេរិកាំងសាលប្រជុំ សូវ ហុងគុយ អគារ លីម គីមណយ រាជធានីភ្នំពេញ ដោយបានអញ្ជើញលោក ផាន់ ចាន់ពៅ ប្រធានដេប៉ាតឺម៉ង់ចិត្តវិទ្យា នៃសាកលវិទ្យាល័យភូមិន្ទភ្នំពេញ ជាអ្នកជំនាញចិត្តសាស្រ្តមកបំភ្លឺជុំវិញចិត្តសាស្រ្តសិស្សជូនបុគ្គលិក លោកគ្រូ អ្នកគ្រូ។ លោកវាគ្មិនបានស្ងោចសរសើរ ចំពោះសាលារៀន អន្តរទ្វីប អាមេរិកាំង ដែលបានយកចិត្តទុកដាក់យ៉ាងផុសផុលលើផ្នែកចិត្តសាស្រ្តសិស្ស ព្រោះវាជាចំណុចសំខាន់មួយក្នុងការអប់រំសិស្សឱ្យមានគុណភាព។ លោកវាគ្មិនបានចែករំលែក គន្លឹះសំខាន់ៗជាច្រើនទៅដល់លោកគ្រូ អ្នកគ្រូ និងបុគ្គលិក ហើយសង្ឃឹមថាអ្នកដែលបានចូលរួមសិក្ខាសាលានេះនឹងទទួលបាននូវចេំណេះដឹងថ្មី បទពិសោធថ្មី ហើយអភិវឌ្ឍខ្លួន និងសាលារៀន អន្តរទ្វីប អាមេរិកាំងឱ្យកាន់តែរីកចម្រើនបន្ថែមទៀត។
July 21st, 2018 by Veasna Kheang
កាលពីថ្ងៃទី២០ ខែកក្កដា ឆ្នាំ២០១៨ កន្លងទៅនេះ គណៈកម្មការសាលារៀន អន្តរទ្វីប អាមេរិកាំង បានសហការជាមួយគេហទំព័រអនឡាញ (E-School Cambodia) ដើម្បីរៀបចំសិក្ខាសាលាស្ដីពី ការចែកលេខសម្ងាត់ (Password) និងណែនាំអំពីរបៀបរៀនតាមប្រព័ន្ធ Online ជូនដល់សិស្សថ្នាក់ទី១២នៅសាលារៀន អន្តរទ្វីប អាមេរិកាំង សាខាកណ្ដាល។ លោកវាគ្មិន ឯក វណ្ណៈទីន ជាប្រធានក្រុម E-School Cambodia បានបង្ហាញការបង្កើតកម្មវិធីនេះដើម្បីតាមដានលទ្ធផលនៃការសិក្សារបស់សិស្សានុសិស្សតាមរយៈការបញ្ចូលសំណួរ និងលំហាត់អនុវត្ត សម្រាប់ធ្វើតេស្តសាកល្បងសមត្ថភាពរបស់សិស្ស ដែលការធ្វើតេស្ដនេះ ត្រូវបានចែកចេញជាសប្ដាហ៍ ប្រចាំខែ និងប្រចាំឆមាស។ E-School Cambodia មានលោកគ្រូជំនាញពោរពេញទៅបទពិសោធ និងសាស្ត្រាចារ្យល្បីៗនៅទូទាំងកម្ពុជា ដែលនៅតាមដានលទ្ធផលសិស្សក្រោយបញ្ចប់សិក្សាវីដេអូតាមអនឡាញជាដើម។
July 5th, 2018 by Veasna Kheang
សាលារៀន អន្តរទ្វីប អាមេរិកាំង បានសហការជាមួយសាលាសិល្បៈហ៊្វូណនដើម្បីបង្កើតសិក្ខាសាលា ស្តីអំពីវង់ភ្លេងពិណពាទ្យខ្មែរ សម្រាប់សិស្សានុសិស្សនៃសាលារៀន អន្តរទ្វីប អាមេរិកាំង។ នៅក្នុងសិក្ខាសាលានៅថ្ងៃទី០៣ ខែកក្កដា ឆ្នាំ២០១៨ លោក ស៊ុបស័ក្ខរា ជានាយកសាលាសិល្បៈហ៊្វូណន ដែលជាអ្នកធ្វើបង្ហាញអំពីវង់ភ្លេងពិណពាទ្យខ្មែរ។ លោកបង្ហាញឧបករណ៍ភ្លេងពិណពាទ្យ រួមមាន ស្គរធំ ស្គរសំភោរ រនាតឯក រនាតធុង ស្រឡៃ គង ឈឹងជាដើមដើម្បីឱ្យសិស្សានុសិស្សស្គាល់មុខងារឧបករណ៍ភ្លេងពិណពាទ្យទាំងនេះ។ កាលលើកយកប្រធានបទស្តីអំពីវង់ភ្លេងពិណពាទ្យខ្មែរដើម្បីសិស្សានុសិស្សបានស្វែងយល់ដឹងកាន់ច្បាស់អំពីសិល្បៈខ្មែរបុរាណពីសំណាក់អ្នកស្រាវជ្រាវសិល្បៈខ្មែរបុរាណ។ ម៉្យាងទៀតលោកបានបកស្រាយកុំឱ្យកូនខ្មែរល្មមឈប់យល់ច្រឡំភ្លេងពិណពាទ្យជាភ្លេងសៀមទៀតទៅ ព្រោះវាមិនមែនជាភ្លេងសៀមដូចដែលមនុស្សភាគច្រើនហៅនោះទេ ដោយលោកបានបង្ហាញពីប្រវត្តិ និងការវិវត្តរបស់វា ចំណែកឧបករណ៍តន្រ្ដីពិណវិញ មានចម្រុះគ្នា ដូចជាខ្សែមួយ ខ្លុយ ស្គរ ឈឹង ដែលគេលេងសម្រាប់ប្រគំក្នុងពិធីសក្ការៈ និងសម្ដែងទស្សនីយភាពផ្សេងៗនៅក្នុងរឿងទេវកថាជាដើម។ ហើយឧបករណ៍វង់ភ្លេងទាំងពីរនេះមានឆ្លាក់ជាប់នៅតាមជញ្ជាំងប្រាសាទនានា ហើយភ្លេងពិណពាទ្យ ដែលខ្មែរស្គាល់សព្វថ្ងៃនេះ គឺស្លចេញពីការរួមផ្សំបញ្ចូលគ្នារវាងវង់ភ្លេងពិណនិងវង់ភ្លេងពាទ្យ ដោយគេកំណត់យកឈ្មោះពិណ និងពាទ្យ ជាវង់ភ្លេងពិណពាទ្យ។ ជាពិសេសនោះលើជញ្ជាំងប្រាសាទបុរាណមានដូចជា បាយ័ន តាព្រហ្មទន្លេបាទីនិងប្រាសាទសំបូរព្រៃគុកជាដើម សុទ្ធតែមានចម្លាក់ឧបករណ៍វង់ភ្លេងទាំងនេះ។
June 27th, 2018 by Veasna Kheang
កាលពីថ្ងៃទី២៦ ខែមិថុនា ឆ្នាំ២០១៨ កន្លងទៅនេះ គណៈកម្មាការ នៃសាលារៀន អន្តរទ្វីប អាមេរិកាំង សាខាម៉ៅសេទុងបានសហការជាមួយប្រាយអ៊ិន ហូលឌិនដើម្បីរៀបចំសិក្ខាសាលាស្តីអំពី សុខភាពភ្នែកកុមារ ជូនដល់សិស្សានុសិស្សថ្នាក់ទី៥ និងទី៦។ សិក្ខាសាលានេះដើម្បីផ្តល់ជាវិធីការពារភ្នែក ការថែទាំ និងពិនិត្យភ្នែកដល់សិស្សានុសិស្សពីព្រោះសាលារៀន អន្តរទ្វីប អាមេរិកាំង តែងតែយកចិត្តទុកដាក់ទៅលើសុខភាពរបស់កុមារ។ ចំណែកវាលគ្មិនក្នុងកម្មវិធីនេះគឺ លោក គង់ នាត នាយកវិទ្យាស្ថានស្តារគំហើញប្រាយអ៊ិន ហូលឌិន បានបង្ហាញថា ការដឹងពីសុខភាពភ្នែករបស់កុមារ បានលឿន និងទាន់ពេលវេលា គឺជួយបានច្រើន ដូចជាជួយទប់ស្កាត់កុំឱ្យកុមារមានបញ្ហាម្ញូបធ្ងន់ធ្ងរ ឬរហូតដល់ពិការ ។ ការម្ញូបភ្នែករបស់កុមារមានផលប៉ះពាល់ជាច្រើន ដូចជាប៉ះពាល់ដល់ការសិក្សា ការចំណាយថវិកាដើម្បីព្យាបាល ដែលធ្វើឱ្យប៉ះពាល់ដល់ជីវភាពគ្រួសារជាដើម។ លោកវាលគ្មិនក៏បានបង្ហាញពី មូលហេតុដែលនាំឱ្យភ្នែកម្ញូប បណ្តាលមកពី កំណើត(គ្រាប់ភ្នែកមានទំហំវែង ឬធំ កញ្ចក់ភ្នែកកោងខ្លាំងខុសពីធម្មតា) កត្តាតំណរពូជ (ឪពុកម្តាយមានភ្នែកមីញ៉ូបកម្រិតខ្ពស់) ការអានសៀវភៅ មើលទូរទស្សន៍ កុំព្យូទ័រ គ្រឿងអេឡិចត្រូនិច និងទូរស័ព្ទ ហើយវាលគ្មិនបានផ្តល់ជាយោបល់ថាកុមារគ្រប់ត្រូវតែទៅពិនិត្យភ្នែកឱ្យបានមួយឆ្នាំម្តង ទោះកុមារនោះ គ្មាន ឬមានបញ្ហាភ្នែកក៏ដោយ។
